ភ្នំពេញ៖ អង្គការហូបកម្ពុជាបានប្រកាសគាំទ្រចំពោះរដ្ឋសភាដែលបាន សម្រេចអនុម័តលើសេចក្តីព្រាងច្បាប់ធម្មនុញ្ញស្តីពីវិសោធនកម្មរដ្ឋធម្មនុញ្ញ កាលពីថ្ងៃទី ២៨ ខែកក្កដា ឆ្នាំ២០២២ កន្លងទៅនេះ។

ក្នុងញាត្តិគាំទ្រ អង្គការមួយនេះលើកឡើងថា យើងខ្ញុំទាំងអស់គ្នាយល់ឃើញថា៖ «សំណើរធ្វើវិសោធនកម្មរដ្ឋធម្មនុញ្ញលើកទី១០នេះ ក៏មិនខុសពីការធ្វើវិសោធនកម្មទាំង ៩លើកកន្លងមកផងដែរ គឺត្រូវបានធ្វើឡើងដោយឈរលើគោលការណ៍គ្រឹះទាំងឡាយដែលមានចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជាឆ្នាំ១៩៩៣ ជាអាទិ៍របបប្រជាធិបត្តេយ្យពហុបក្ស និងរបបរាជានិយមអាស្រ័យរដ្ឋធម្មនុញ្ញ និងគោលបំណងបំពេញចន្លោះខ្វះខាតក្នុងរដ្ឋធម្មនុញ្ញ និងដើម្បីធានាការពារនូវស្ថិរភាពនយោបាយ ភាពមិនជាប់តាំងដែរស្ថាប័នជាតិឱ្យដំណើរការជាប្រក្រតីដោយរលូន និងមាននិរន្តរភាពគ្រប់កាលៈទេសៈ ក្នុងគោលបំណងការពារនូវឧត្តមប្រយោជន៍របស់ប្រទេសជាតិ និងប្រជាជន»។

រដ្ឋសភាពទើបតែបានអនុម័តធ្វើវិសោធនកម្មរដ្ឋធម្មនុញ្ញជាលើកទី១០ កាលពីថ្ងៃទី២៨ ខែកក្កដា ឆ្នាំ២០២២។

បើតាមរដ្ឋមន្រ្តីយុត្តិធម៌ កើត រិទ្ធ ការធ្វើវិសោធនកម្មលើរដ្ឋធម្មនុញ្ញនាពេលនេះគឺវាចាំបាច់ក្នុងការធានានូវដំណើរការរបស់ស្ថាប័នរដ្ឋថែរក្សាស្ថិរភាព សន្ដិភាព ក្ដីសុខសាន្តរបស់ប្រជាជន បំពេញនូវចន្លោះខ្វះខាតនៃរដ្ឋធម្មនុញ្ញ ហើយនៅតែប្រកាន់ខ្ជាប់នូវគោលការណ៍គ្រឹះនៃរបបប្រជាធិបតេយ្យសេរីពហុបក្ស គោលការណ៍របបរាជានិយមអាស្រ័យរដ្ឋធម្មនុញ្ញ និងរបបដឹកនាំអាស្រ័យសភាពរបស់កម្ពុជា៕